Молитвы о Россіи
Молитвы о спасеніи Россіи. (Молитвы за Святую Русь, страждущее Отечество и возстановленіе Русскаго Православнаго Самодержавнаго Царства).

«Го́споди Бо́же, Спаси́телю на́шъ, къ Тебѣ́ припа́даемъ сокруше́ннымъ се́рдцемъ и исповѣ́дуемъ грѣхи́ и беззако́нія на́ша, и́миже отврати́хомъ Твое́ благоутро́біе. Отступи́хомъ бо отъ Тебе́, Влады́ко, и за́повѣдей Твои́хъ не соблюдо́хомъ, ниже́ сотвори́хомъ, а́ще же и попусти́хомъ прикосну́тися Пома́заннику Твоему́. Сего́ ра́ди разгнѣ́вался еси́ на наро́дъ на́шъ, просте́рлъ еси́ ру́ку Твою́ и воспла́кася земля́ на́ша и болѣ́зни сме́ртныя объя́ша на́съ. Гла́домъ, ску́достію и нестрое́ніемъ порази́лъ еси́ страну́ на́шу и да́лъ еси́ на́съ на попра́ніе враго́мъ на́шимъ. Ума́лихомся па́че всѣ́хъ язы́къ и бы́хомъ поноше́ніе да́же до коне́цъ земли́. Вѣ́мы оба́че, я́коже наказу́еши на́съ, я́ко Оте́цъ сы́ны, да скорбьми́ обрати́ши на́съ къ Себѣ́, тѣ́мже въ покая́ніи зове́мъ Ти́: оста́ви на́мъ до́лги на́ша и изба́ви на́съ отъ вра́гъ на́шихъ. Бо́же си́лъ, Царю́ ца́рствующихъ и Го́споди госпо́дствующихъ, при́зри ми́лостивымъ о́комъ на лю́тѣ стра́ждущую Це́рковь на́шу Россíйскую, уста́ви гоне́ніе, огради́ ю́ моли́твами святи́телей ея́ и вѣ́рныхъ служи́телей олтаря́ Твоего́. Ты́ вѣ́си, Всемилосе́рдый, бѣду́ на́шу, слы́шиши рыда́ніе всего́ наро́да на́шего, стена́нія си́рыхъ, вдови́цъ и младе́нцевъ непови́нныхъ, зри́ши мно́жество изгна́нныхъ и въ го́рькихъ рабо́тахъ су́щихъ, му́чимыхъ и тма́ми те́мъ погиба́ющихъ. Пощади́ на́съ грѣ́шныхъ, Го́споди, умилосе́рдися надъ Оте́чествомъ на́шимъ, мно́гіе го́ды въ порабоще́ніи безбо́жнымъ власте́мъ стра́ждущимъ...»

МОЛИТВЫ О СПАСЕНІИ РОССІИ:

Го́споди, воздви́гни си́лу Твою́ и пріиди́ во е́же спасти́ на́съ!

Моли́тва покая́нная.

Благослове́нъ еси́, Го́споди Бо́же оте́цъ на́шихъ, и хва́льно и просла́влено и́мя Твое́ во вѣ́ки, я́ко пра́веденъ еси́ о всѣ́хъ, я́же сотвори́лъ еси́ на́мъ, и вся́ дѣла́ Твоя́ и́стинна и пра́ви путіе́ Твои́, и вси́ суди́ Твои́ и́стинни: и судьбы́ и́стинны сотвори́лъ еси́ по всѣ́мъ, я́же наве́лъ еси́ на ны́. Яко согрѣши́хомъ и беззако́нновахомъ отступи́вше отъ Тебе́, и прегрѣши́хомъ во всѣ́хъ, и за́повѣдей Твои́хъ не послу́шахомъ, ниже́ соблюдо́хомъ, ниже́ сотвори́хомъ, я́коже заповѣ́далъ еси́ на́мъ, да бла́го на́мъ бу́детъ. И пре́далъ еси́ на́съ въ ру́ки враго́въ беззако́нныхъ, ме́рзкихъ отсту́пниковъ, и человѣ́комъ непра́веднымъ и лука́внѣйшимъ па́че всея́ земли́. И ны́нѣ нѣ́сть на́мъ отве́рзти у́стъ: сту́дъ и поноше́ніе бы́хомъ рабо́мъ Твои́мъ и чту́щимъ Тя́. Не преда́ждь же на́съ до конца́ и́мене Твоего́ ра́ди, и не разори́ завѣ́та Твоего́, и не отста́ви ми́лости Твоея́ отъ на́съ. Яко, Влады́ко, ума́лихомся па́че всѣ́хъ язы́къ и есмы́ смире́ни по все́й земли́ дне́сь, грѣ́хъ ра́ди на́шихъ. И нѣ́сть во вре́мя сіе́ нача́льника, проро́ка и вожда́. И ны́нѣ, возслѣ́дуемъ всѣ́мъ се́рдцемъ и бои́мся Тебе́ и и́щемъ лица́ Твоего́. Не посрами́ на́съ, но сотвори́ съ на́ми по кро́тости Твое́й, и по мно́жеству ми́лости Твоея́, и моли́твъ ра́ди пречи́стыя Ма́тере Твоея́ и всѣ́хъ святы́хъ Твои́хъ изми́ на́съ по чудесе́мъ Твои́мъ, и да́ждь сла́ву и́мени Твоему́, Го́споди. И да посра́мятся вси́ явля́ющіи рабо́мъ Твои́мъ зла́я, и да постыдя́тся отъ вся́кія си́лы и крѣ́пость и́хъ да сокруши́тся. И да разумѣ́ютъ вси́, я́ко Ты́ еси́ Госпо́дь Бо́гъ на́шъ, еди́нъ и сла́венъ по все́й вселе́ннѣй. Ами́нь.

(Слу́жба святы́мъ Ца́рственнымъ Му́ченикомъ... Мюнхенъ: Изданіе обители преп. Іова Почаевскаго, 1996, стр. 22).
 

Моли́тва о спасе́ніи Россíи.

Го́споди Іису́се Христе́, Бо́же на́шъ, пріими́ отъ на́съ недосто́йныхъ рабо́въ Твои́хъ усе́рдное моле́ніе сіе́ и, прости́въ на́мъ вся́ согрѣше́нія на́ша, помяни́ всѣ́хъ враго́въ на́шихъ, ненави́дящихъ и оби́дящихъ на́съ, и не возда́ждь и́мъ по дѣло́мъ и́хъ, но по вели́цѣй Твое́й ми́лости обрати́ и́хъ: невѣ́рныхъ ко правовѣ́рію и благоче́стію, вѣ́рныхъ же во е́же уклони́тися отъ зла́ и твори́ти благо́е. На́съ же всѣ́хъ и Це́рковь Твою́ Святу́ю всеси́льною Твое́ю крѣ́постію отъ вся́каго зла́го обстоя́нія ми́лостивно изба́ви. Стра́ждущую страну́ Россíйскую отъ лю́тыхъ безбо́жникъ и вла́сти и́хъ свободи́ и возста́ви престо́лъ Правосла́вныхъ Царе́й. Вѣ́рныхъ рабо́въ Твои́хъ, въ ско́рби и печа́ли де́нь и но́щь вопію́щихъ къ Тебѣ́, многоболѣ́зненный во́пль услы́ши, Многоми́лостиве Бо́же на́шъ, и изведи́ отъ поги́бели живо́тъ и́хъ. Пода́ждь же ми́ръ и тишину́, любо́вь и укрѣпле́ніе, и ско́рое примире́ніе лю́демъ Твои́мъ, и́хже честно́ю Твое́ю Кро́вію искупи́лъ еси́. Но и отступи́вшимъ отъ Тебе́ и Тебе́ не и́щущимъ явле́нъ бу́ди, во е́же ни еди́ному отъ ни́хъ поги́бнути, но всѣ́мъ и́мъ спасти́ся и въ ра́зумъ и́стины пріити́, да вси́ въ согла́сномъ единомы́сліи и въ непреста́нной любви́ просла́вятъ пречестно́е и́мя Твое́, терпѣливоду́шне незло́биве Го́споди, во вѣ́ки вѣко́въ. Ами́нь.

(Н. Н. Шумскихъ . Церковнославянская грамота. Учебные очерки. СПб: Православное Общество почитателей преп. Іосифа Волоцаго, 1998, стр. 456).
 

О, мíра Засту́пнице, Ма́ти Всепѣ́тая! со стра́хомъ, вѣ́рою и любо́вію припа́дающе предъ честно́ю ико́ною Твое́ю Держа́вною, усе́рдно мо́лимъ Тя́: не отврати́ лица́ Твоего́ отъ прибѣга́ющихъ къ Тебѣ́. Умоли́, милосе́рдная Ма́ти Свѣ́та, Сы́на Твоего́ и Бо́га на́шего, Сладча́йшаго Го́спода Іису́са Христа́, да сохрани́тъ въ ми́рѣ страну́ на́шу, да утверди́тъ держа́ву на́шу въ благоде́нствіи, и изба́витъ на́съ отъ междоусо́бныя бра́ни, да укрѣпи́тъ Святу́ю Це́рковь на́шу Правосла́вную, и непозы́блему соблюде́тъ ю́ отъ невѣ́рія, раско́ла и е́ресей. Не и́мамы бо ины́я по́мощи, ра́звѣ Тебе́, Пречи́стая Дѣ́во: Ты́ еси́ всеси́льная христіа́нъ Засту́пница предъ Бо́гомъ, пра́ведный гнѣ́въ Его́ умягча́ющая. Изба́ви всѣ́хъ, съ вѣ́рою Тебѣ́ моля́щихся, отъ паде́ній грѣхо́вныхъ, отъ навѣ́та злы́хъ человѣ́къ, отъ гла́да, ско́рбей и болѣ́зней. Да́руй на́мъ ду́хъ сокруше́нія, смире́ніе се́рдца, чистоту́ помышле́ній, исправле́ніе грѣхо́вныя жи́зни и оставле́ніе согрѣше́ній на́шихъ; да вси́, благода́рнѣ воспѣва́юще вели́чія Твоя́, сподо́бимся Небе́снаго Ца́рствія и та́мо со всѣ́ми святы́ми просла́вимъ пречестно́е и великолѣ́пое и́мя въ Тро́ицѣ сла́вимаго Бо́га: Отца́, Сы́на и Свята́го Ду́ха. Ами́нь.

(Ака́ѳистъ Пресвятѣ́й Богоро́дицѣ явле́нія ра́ди чудотво́рныя Ея́ ико́ны «Держа́вныя»... Jordanville: Типогра́фія преп. Іова Поча́евскаго, 1984, стр. 29-30).
 

Моли́тва свято́му царю́ му́ченику Никола́ю.

О, святы́й страстоте́рпче царю́ му́чениче Нико́лае, Пома́занника Своего́ тя́ Госпо́дь избра́, во е́же ми́лостивно и пра́во суди́ти лю́демъ твои́мъ и храни́телемъ ца́рства правосла́внаго бы́ти. Ца́рское служе́ніе сіе́ и о душа́хъ попече́ніе со стра́хомъ Бо́жіимъ соверша́лъ еси́. Испыту́я же тя́, я́ко зла́то въ горни́лѣ, ско́рби го́рькія Госпо́дь ти́ попусти́, я́коже Іову многострада́льному, послѣди́ же престо́ла ца́рскаго лише́ніе и му́ченическую сме́рть посла́ ти. Вся́ сія́ кро́тко претерпѣ́вый, я́ко и́стинный ра́бъ Христо́въ, наслажда́ешися ны́нѣ вы́шнія сла́вы у престо́ла всѣ́хъ Царя́, ку́пно со святы́ми му́ченики: свято́ю цари́цею Алекса́ндрою, святы́мъ о́трокомъ царе́вичемъ Алексíемъ, святы́ми царе́внами Ольгою, Татіа́ною, Марíею и Анастасíею и съ вѣ́рными слуги́ твои́ми, та́же со свято́ю му́ченицею княги́нею Елисаве́тою и со всѣ́ми ца́рственными му́ченики и свято́ю му́ченицею Варва́рою. Но я́ко имѣ́я дерзнове́ніе ве́ліе у Христа́ Царя́, Его́же ра́ди вси́ пострада́ша, моли́ съ ни́ми, да отпу́ститъ Госпо́дь грѣ́хъ наро́да, не возбрани́вшаго убіе́ніе твое́, царя́ и пома́занника Бо́жія, да изба́витъ Госпо́дь стра́ждущую страну́ Россíйскую отъ лю́тыхъ безбо́жникъ, за грѣхи́ на́ша и отступле́ніе отъ Бо́га попуще́нныхъ, и возста́витъ престо́лъ правосла́вныхъ царе́й, на́мъ же пода́стъ грѣхо́въ проще́ніе, и на вся́кую добродѣ́тель наста́витъ на́съ, да стяжи́мъ смире́ніе, кро́тость и любо́вь, я́же сíи му́ченицы яви́ша, да сподо́бимся небе́снаго ца́рствія, идѣ́же ку́пно съ тобо́ю и всѣ́ми святы́ми новому́ченики и исповѣ́дники Россíйскими просла́вимъ Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

(Слу́жба святы́мъ Ца́рственнымъ Му́ченикомъ... Мюнхенъ: Изданіе обители преп. Іова Почаевскаго, 1996, стр. 23).
 

Моли́тва святы́мъ Новому́ченикомъ и Исповѣ́дникомъ Россíйскимъ.

Святíи новому́ченицы и исповѣ́дницы Це́ркве Россíйскія, услы́шите усе́рдную мольбу́ на́шу! Вѣ́мы, я́ко нѣ́ціи отъ ва́съ, еще́ о́троцы су́ще, послу́шающе о дре́влихъ страстоте́рпцѣхъ, въ се́рдцѣ свое́мъ помы́слиша, коли́ко прелюбе́зно и доброхва́льно е́сть таковы́мъ подража́ти, и́хже ни му́ки, ни сме́рть не разлучи́ша отъ любве́ Бо́жія. Бла́го же ва́мъ, я́ко послѣ́довали есте́ вѣ́рѣ и терпѣ́нію тѣ́хъ, о ни́хже слы́шасте и и́хже возлюби́сте. А поне́же на вся́кое вре́мя возмо́жно е́сть наити́ на ны́ испыта́ніемъ неча́яннымъ, испроси́те отъ Го́спода на́мъ му́жества да́ръ, и́же толи́ко благопотре́бенъ е́сть въ житіи́ человѣ́честѣмъ. Вся́ концы́ оте́чества на́шего страда́ньми свои́ми освяти́вшіи, я́ко о́бщіи за вся́ ны́ моли́твенницы, умоли́те Бо́га изба́вити лю́ди своя́ отъ и́га, ужа́снѣйшаго па́че вся́каго ино́го. И да отпу́стится на́мъ и всему́ ро́ду на́шему грѣ́хъ, на наро́дѣ Россíйскомъ тяготѣ́ющій: убіе́ніе царя́, пома́занника Бо́жія, святи́телей же и па́стырей съ па́ствою, и страда́нія исповѣ́дниковъ, и оскверне́ніе святы́нь на́шихъ. Да упраздня́тся раско́лы въ Це́ркви на́шей, да бу́дутъ вси́ еди́но, и да изведе́тъ Госпо́дь на жа́тву дѣ́латели Своя́, сíесть да не оскудѣва́етъ Це́рковь па́стырьми до́брыми, и́же и́муть просвѣща́ти свѣ́томъ и́стинныя вѣ́ры сто́ль вели́кое мно́жество люде́й, вѣ́рѣ ненауче́нныхъ, или́ отъ вѣ́ры отврати́вшихся. Недосто́йни есмы́ ми́лости Бо́жія, оба́че страда́ній ра́ди ва́шихъ Христо́съ Бо́гъ на́шъ да уще́дритъ и поми́луетъ всѣ́хъ на́съ, въ по́мощь ва́съ призыва́ющихъ. Мы́ же Ему́, Спаси́телю на́шему, со Отце́мъ и со Святы́мъ Ду́хомъ сокруше́ніе о грѣсѣ́хъ и благодаре́ніе за вся́ всегда́ да прино́симъ, сла́вяще Его́ во вѣ́ки вѣко́въ. Ами́нь.

(Слу́жба святы́мъ Новому́ченикомъ и Исповѣ́дникомъ Россíйскимъ. Jordanville: Тѵпографія Пр. Іова Почаевскаго, 1983, стр. 38-39).
 

Моли́тва св. Патріа́рха Ти́хона о гони́мыхъ бра́тіяхъ на́шихъ.

Милосе́рдный Го́споди, Бо́же си́лъ! Изъ глубины́ душе́вныя смире́нно вопіе́мъ Ти́: си́лою Креста́ Твоего́ смири́ де́рзость ненави́дящихъ и ху́лящихъ и́мя Твое́ Свято́е, оскверня́ющихъ и разруша́ющихъ святы́ню хра́мовъ Твои́хъ и лю́тѣ гоня́щихъ вѣ́рныхъ ча́дъ святы́я Це́ркви Твоея́. Всѣ́мъ стра́ждущимъ и изнемога́ющимъ за исповѣ́даніе вѣ́ры во и́мя Твое́ посли́ а́нгеловъ Твои́хъ святы́хъ, да укрѣпля́ются вѣ́рныя лю́ди Твоя́ въ несе́ніи блага́го и́га Твоего́ а́нгельскимъ покро́вомъ и предста́тельствомъ Пресвяты́я Богоро́дицы и всѣ́хъ святы́хъ Твои́хъ. Многоми́лостивый Го́споди! Болѣ́зненнымъ се́рдцемъ, со слеза́ми мо́лимся Тебѣ́: при́зри на во́пль, стена́ніе и умиле́нныя моли́твы всѣ́хъ вѣ́рныхъ люде́й, отъ нападе́нія враго́въ Твои́хъ, Го́споди, стра́ждущихъ, святы́ни хра́мовъ Твои́хъ и благода́ти святы́хъ Та́инствъ Твои́хъ лише́нныхъ. Уми́лостивися, Го́споди, надъ младе́нцы, свѣ́томъ свята́го креще́нія неозаре́нныя и печа́тію да́ра Ду́ха Свята́го незапечатлѣ́нныя. Пощади́, Го́споди, о́троки, ю́ноши и дѣ́вы, соблазня́емыя ненави́стниками и́мени Твоего́ на вся́кое невѣ́ріе, нече́стіе, богоху́льство, распу́тное житіе́, за́висть и зло́бу къ бли́жнему своему́. Умилосе́рдись, Го́споди, на ста́рцы и боля́щія, лише́нныя въ предсме́ртный ча́съ благода́тнаго утѣше́нія въ елеопома́заніи и прича́стіи Святы́хъ Та́инъ Твои́хъ и не ча́ющія христіа́нскаго погребе́нія. Огради́, Го́споди, мона́шествующихъ ли́къ, изъ святы́хъ оби́телей изгна́нныхъ и поноше́нія терпя́щихъ. Наипа́че же утверди́, Го́споди, крѣ́постію Ду́ха Твоего́ свяще́нники Твоя́, дабы́ небоя́зненно, да́же до сме́рти, во едине́ніи стоя́ли на стра́жѣ ста́да Твоего́. Всѣ́хъ же, Тебе́ ра́ди прія́вшихъ му́ченическую кончи́ну, сподо́би со святы́ми Твои́ми въ вѣ́чной сла́вѣ Твое́й ца́рствовати. На Крестѣ́ моли́выйся за распина́телей Твои́хъ и пріе́мый въ послѣ́дній ча́съ разбо́йничье покая́ніе, не погуби́, о Го́споди, отсту́пниковъ, хули́телей и гони́телей святы́я вѣ́ры и святы́я Це́ркви Твоея́, но, а́ще возмо́жно сіе́, да́руй и и́мъ ра́дость позна́ти Тя́, Боже́ственную Любо́вь и Прему́дрость, и дни́ свои́ въ и́стинномъ покая́ніи сконча́ти. На Тя́, Го́споди, упова́емъ и не постыди́мся во вѣ́къ, Ты́ бо еси́ Засту́пниче на́шъ, По́мощь и Побѣ́да, побѣди́вшая міръ, Свѣ́тъ па́че вся́каго свѣ́та, Ра́дость па́че вся́кія ра́дости, Упова́ніе па́че вся́каго упова́нія, Жи́знь и́стинная и спасе́ніе вѣ́чное, и Тебѣ́, въ Тро́ицѣ покланя́емому, сла́ву вси́ возсыла́емъ, ны́нѣ и при́сно и во вѣ́ки вѣко́въ. Ами́нь.

(«Православная Русь». Jordanville: Тѵпографія Пр. Іова Почаевскаго, 1995, №9, стр. 5).
 

Го́споди Іису́се Христе́ Сы́не Бо́жій, сохрани́ отъ обольще́нія близъ гряду́щаго богоме́рзскаго анти́христа и избави́ отъ всѣ́хъ ко́зней его́ и укро́й на́съ и вся́ правосла́вныя христіа́ны отъ кова́рныхъ сѣ́тей его́ въ сокрове́нной пу́стынѣ Твоего́ спасе́нія и не да́й на́мъ, Го́споди, убоя́ться стра́ха діа́вольскаго па́че стра́ха Бо́жія и не отступи́ть отъ Тебя́ и отъ свято́й Це́ркви Твое́й. Но да́ждь, Го́споди, лу́чше пострада́ть и умере́ть за и́мя Твое́ Свято́е и вѣ́ру правосла́вную, но не отре́чься отъ Тебя́ и не приня́ть печа́ти прокля́таго анти́христа и не поклони́ться ему́. Да́ждь на́мъ, Го́споди, де́нь и но́щь пла́чъ и сле́зы о грѣха́хъ на́шихъ и пощади́ на́съ, Го́споди, въ де́нь Стра́шнаго Суда́ Твоего́. Ами́нь.

(«Православная Русь». Jordanville: Тѵпографія Пр. Іова Почаевскаго, 2001, №3, стр. 7).
 

Изба́ви мя́, Го́споди, отъ обольще́нія богоме́рзскаго и зла́го анти́христа, близгряду́щаго, и укро́й меня́ отъ сѣ́тей его́ въ сокрове́нной пусты́нѣ Твоего́ спасе́нія. Да́ждь ми́, Го́споди, крѣ́пость и му́жество тве́рдаго исповѣ́данія Имени Твоего́ Свята́го, да не отступлю́ стра́ха ра́ди діа́вольскаго, да не отреку́сь отъ Тебя́, Спаси́теля и Искупи́теля моего́, отъ свято́й Твое́й Це́ркви. Но да́ждь ми́, Го́споди, де́нь и но́щь пла́чъ и сле́зы о грѣха́хъ мои́хъ и пощади́ мя́, Го́споди, въ ча́съ Стра́шнаго Суда́ Твоего́. Ами́нь.

(«Русскій Паломникъ», 1993, №7, стр. 42; Житіе Оптинскаго старца Анатолія (Потапова). Изд. Введенскій Оптиной пустыни, 1995, стр. 150).
 

Милосе́рдый Го́споди Бо́же си́лъ! Изъ глубины́ душе́вныя въ ско́рби и печа́ли на́шей смире́нно вопіе́мъ: пріими́ отъ на́съ недосто́йныхъ ра́бъ Твои́хъ съ покая́ніемъ и умиле́ніемъ приноси́мое моле́ніе сіе́ и прости́ на́мъ вся́ согрѣше́нія во́льная и нево́льная. Це́рковь Твою́ святу́ю всеси́льною Твое́ю крѣ́постію отъ вся́каго зла́го обстоя́нія ми́лостиво изба́ви. Оте́чество на́ше отъ лю́тыхъ безбо́жникъ и вла́сти и́хъ свободи́. Си́лою креста́ Твоего́ побѣди́, смири́ де́рзость ненави́дящихъ и ху́лящихъ и́мя Твое́ свято́е, оскверня́ющихъ и разруша́ющихъ святы́ню хра́мовъ Твои́хъ, и лю́тѣ гоня́щихъ вѣ́рныхъ ча́дъ Святы́я Це́ркви Твоея́. Всѣ́мъ стра́ждущимъ и изнемога́ющимъ за исповѣ́даніе вѣ́ры за и́мя Твое́, посли́ а́нгеловъ Твои́хъ святы́хъ, да укрѣпля́ются вѣ́рныя лю́ди Твоя́ въ несе́ніи блага́го и́га Твоего́ а́нгельскимъ покро́вомъ и предста́тельствомъ Святы́хъ Твои́хъ. Многоми́лостиве Го́споди! Болѣ́зненнымъ се́рдцемъ, со слеза́ми мо́лимся Тебѣ́, — при́зри на во́пль, стена́ніе и умиле́нныя моли́твы всѣ́хъ вѣ́рныхъ люде́й, отъ нападе́нія враго́въ Твои́хъ, Го́споди, стра́ждущихъ, святы́ни хра́мовъ Твои́хъ и благода́ти святы́хъ та́инствъ Твои́хъ лише́нныхъ. Уми́лостивися, Го́споди, надъ младе́нцы, свѣ́томъ свята́го креще́нія неозаре́нныя и печа́тію да́ра Ду́ха Свята́го незапечатлѣ́нныя. Пощади́, Го́споди, о́троки, ю́ноши и дѣ́вы соблазня́емые ненави́стниками Имене Твоего́ на вся́кое невѣ́ріе, нече́стіе, богоху́льство, распу́тное житіе́, за́висть и зло́бу ко бли́жнему своему́. Умилосе́рдися, Го́споди, — на ста́рцы и боля́щія, огради́, Го́споди, — мона́шествующихъ ли́къ, изъ святы́хъ Оби́телей изгна́нныхъ и поноше́нія терпя́щихъ. Наипа́че же утверди́, Го́споди, крѣ́постію Ду́ха Твоего́ Свята́го, архіере́и и свяще́нники Твоя́, дабы́ небоя́зненно, да́же до сме́рти, во едине́ніи стоя́ли на стра́жѣ ста́да Твоего́. Всѣ́хъ же, Тебе́ ра́ди прія́вшихъ му́ченическую кончи́ну, сподо́би со Святы́ми Твои́ми въ вѣ́чной сла́вѣ Твое́й ца́рствовати. На крестѣ́ моли́выйся за распина́телей Твои́хъ, и пріе́мый въ послѣ́дній ча́съ разбо́йниче покая́ніе, не погуби́, о, Го́споди, отсту́пниковъ, хули́телей и гони́телей святы́я вѣ́ры, но, а́ще возмо́жно сіе́, да́руй и и́мъ ра́дость позна́ти Тя́, Боже́ственную Любо́вь и Прему́дрость, и дни́ своя́ въ и́стинномъ покая́ніи сконча́ти. Ты́ бо еси́ заступле́ніе на́ше, По́мощь и Побѣ́да, побѣди́вшая мíръ; Свѣ́тъ па́че вся́каго свѣ́та, Ра́дость па́че вся́кія ра́дости, упова́ніе па́че вся́каго упова́нія. Жи́знь и́стинная и спасе́ніе вѣ́чное, и Тебѣ́ въ Тро́ицѣ покланя́емому Бо́гу, сла́ву вси́ возсыла́емъ, ны́нѣ и при́сно и во вѣ́ки вѣко́въ. Аминь.

(«Континентъ», 1980, №24, стр. 385).