СЛОВО 50.
Въ суббо́ту 5-я недѣ́ли поста́, свята́го Іоа́нна Златоу́стаго сло́во похва́льно о Пресвятѣ́й и сла́внѣй Влады́чицѣ на́шей Богоро́дицѣ.

Возсія́ на́мъ, бра́тіе, дне́сь, свѣ́тлое Пра́ведное Со́лнце, сы́й пре́жде восходя́щаго естество́мъ, свѣ́тъ присносу́щный, просвѣти́вый вся́ческая: избы́въ тьмы́, и не терплю́ лу́чь его́. Роди́бося, и па́ки помрача́юся стра́хомъ. Рожеству́ ра́дуюся, и о́бразъ смуща́етъ мя́. Но́ваго исто́чника зрю́, и дре́вняго исто́чника бѣжа́ща смотря́ю. Младе́нца ви́дѣхъ ражда́ема, и небеса́ преклоня́ющася на поклоне́ніе Ему́. Ма́терь ражда́ющу Содѣ́теля и ложесна́ не разверза́юща Отроча́, и па́ки Свои́мъ /л. 130 об./ печатлѣ́юща рожество́мъ; Богороди́тельницу безму́жную и Сы́на безъ отца́ ражда́ющася; звѣзду́ сія́ющу и Младе́нца повива́ема, нося́щаго вся́ческая; я́сли образу́ющася Престо́лу небе́сному и скоты́ прилага́ющася херуви́мску предстоя́нію; свѣти́ла сія́юща и а́нгелы ра́дующася и пастухи́ прорица́юща; волхвы́ богосло́вяща, архіере́и же Бо́га ху́ляща; Ирода низпа́дающа, сме́рть разруша́ему; Ада́ма разрѣша́ема и а́да связа́ема; Евву лику́ющу и змíя пла́чущася; плѣ́нники во осла́бѣ бы́вша, а мучи́тели въ му́цѣ; Младе́нца млеко́ ссу́ща и пита́ема Пита́ющаго всю́ тва́рь, на руку́ носи́ма, Нася́щаго вся́. Тѣ́мъ же и а́зъ ужаса́юся, и трепе́щу та́йны, вѣ́ру да иму́ Гавріи́лу и прожену́ стра́хъ, глаго́ля рече́нная къ Марíи и сказа́я чю́до: ра́дуйся, Обра́дованная, Госпо́дь съ Тобо́ю! Ра́дуйся, Пресла́вная, и Прера́дованная, хра́ме одушевле́нный! Ра́дуйся, Обра́дованная, не́бу и земли́ ра́вное жили́ще. Ра́дуйся, Благода́тная, небе́снаго кла́са нежне́ная ни́во! Ра́дуйся, Благода́тная, и́стинный виногра́де и нело́жная Дѣ́во Ма́ти Бо́жія! Ра́дуйся, Благода́тная, невозра́стнаго рожества́ досто́йное /л. 131/ вмѣсти́лище! Ра́дуйся, Благода́тная, невмѣсти́маго естества́ село́ простра́нное! Ра́дуйся, Обра́дованная, облиста́ніе те́мныхъ! Ра́дуйся, Обра́дованная, овдовѣ́вшему мíру невѣ́стство нескве́рное! Ра́дуйся, Благода́тная, истка́вшая нерукоплете́нный вѣне́цъ все́й тва́ри! Ра́дуйся, Благода́тная, огню́ Боже́ственному жили́ще! Ра́дуйся, Благода́тная, свѣ́ту храни́лище. Ра́дуйся, Благода́тная, погру́жшая въ ложесна́хъ сме́рть прама́тернюю! Ра́дуйся, благода́тная, убѣ́ждьшая вселе́нныя неблу́дное возраще́ніе! Ра́дуйся, Благода́тная, гла́домъ уме́ршему естеству́ храни́лище неизда́емое! Она́ же о словесѣ́хъ смяте́ся, и воззрѣ́нія его́ убѣга́ющи, о́бразомъ стоя́щи крестообра́зно, тре́петныма же стоя́щи нога́ма ужаса́шеся, ни бѣжа́ти смѣ́ющи, ни стоя́ти дерза́ющи. Зря́щи безпло́тнаго, а́ки человѣ́ка стоя́ща, пребы́ти стыдя́шеся, чту́щи дѣ́вство, вопроси́ти же несмѣ́яше, трепе́щущи безпло́тнаго. И бѣ́ стра́ха зерца́ло лице́ Дѣ́выя, глаго́лющи въ себѣ́: каково́ е́сть цѣлова́ніе се́? И кто́ цѣлу́етъ мя́? Преоблистава́етъ бо па́че со́лнца и съ пѣ́ніемъ бесѣ́дуетъ; съ небе́сныхъ /л. 131 об./ престо́лъ сы́й, и отрокови́цу цѣлу́етъ; не оболче́нъ е́сть тѣ́ломъ, и́же предстои́тъ, но а́ки нога́ма крило́ма ходя́й по земли, и что́ и́щетъ у земны́я? а́нгелъ явля́ется, и я́ко человѣ́къ вѣща́етъ ко мнѣ́; отъ безпло́тныхъ святы́хъ гла́съ се́й ми явля́етъ и предлага́етъ; со́лнца свѣтлѣ́е и добрѣ́е е́сть лице́мъ, снѣ́га бѣлѣ́йшею ри́зою оболче́нъ е́сть. Юношу ви́жу, пло́тію не обложе́на, ходя́ща по земли́, и слѣ́да число́ не пи́шуща; язы́ка не иму́ща, и цѣлова́нія ми́ глаго́люща; устну́ не иму́ща, и ра́дость мнѣ́ прорица́юща. Не вѣ́дѣ, что́ помышля́ю? Стра́нное видѣ́ніе! Аще у́бо по́сланнаго неразумѣва́ю и ка́ко позна́ю Посла́вшаго и́? ельма́ нареку́ и́, я́ко стра́шенъ, то Нарекова́вый страшнѣ́е; а́ще блиста́ніе помрачи́ ми о́чи, то кацѣ́мъ лице́мъ покры́ю Пра́веднаго Со́лнца? а́ще тва́рь ужаса́етъ мя́, то ка́ко стерплю́ Сотво́ршаго ю́? а́ще раба́ убоя́хся, то ка́ко Влады́ку порожду́? Рече́ же е́й а́нгелъ: не бо́йся, Марíе, не змія́ Тебѣ́ глаго́летъ; не бо́йся, Марíе, Богоро́дицу Тя́ нарица́ю, а не глаго́лю Тебе́ равны́ Бо́гу. Не бо́йся, Марíе, ра́дость Ти́ принесо́хъ, да не преткне́шися, а́ки Евва: отъ о́ныя пло́дъ ме́ртвъ, а отъ Тебе́ Кре́стъ Живо/л. 132/творящь; отъ о́ныя ле́сть, а отъ Тебе́ любо́вь; отъ о́ныя разлуче́ніе человѣ́комъ отъ Зижди́теля, а отъ Тебе́ Бо́жія пло́ть совокупле́ніе несказа́нно; отъ о́ныя мра́чный со́нъ а́довъ, а отъ Тебе́ свѣ́тлый Свѣти́льникъ всему́ мíру; отъ о́ныя кля́тва, а отъ Тебе́ благослове́ніе; отъ о́ныя осужде́ніе, а отъ Тебе́ отда́ніе; отъ о́ныя ско́рбь, а отъ Тебе́ ра́дость; отъ о́ныя сле́зы, а отъ Тебе́ рѣка́ воды́ жи́вы; отъ о́ныя тру́дъ, а отъ Тебе́ поко́й; отъ о́ныя терноро́дная земля́, а отъ Тебе́ тро́ична жи́знь; отъ о́ныя братоненавидѣ́ніе, а отъ Тебе́ человѣколю́біе; отъ о́ныя пото́пъ, а отъ Тебе́ ба́ня безсме́ртная; отъ о́ныя убíйца, а отъ Тебе́ ме́ртвымъ воскресе́ніе; отъ о́ныя двана́десяте колѣ́на ме́рзцыи, а отъ Тебе́ двана́десять апо́столъ боголюбе́зніи; отъ о́ныя сме́рть, расходя́щаяся по́ міру, я́же Тебѣ́ прито́ргшися паде́тъ; отъ о́ныя паде́ніе, а отъ Тебе́ воста́ніе. Не бо́йся, Марíе, обрѣ́те бо благода́ть о́тъ Бога, и се́ за́чнеши Сы́на во́ чревѣ, су́щаго во Отцѣ и во́ плоти; роди́ши Сы́на, Ада́ма дре́внѣйша; роди́ши Сы́на небе́съ вы́шша; роди́ши Сы́на, надъ херуви́мы су́щаго; роди́ши Сы́на, всѣ́хъ Содѣ́теля; /л. 132 об./ роди́ши Сы́на, собезнача́льна Отцу́; роди́ши Сы́на, Ему́же вся́ покланя́ются; роди́ши Сы́на, Его́же пою́тъ неви́димо; роди́ши Сы́на, Ему́же зра́ка не вѣ́мы; роди́ши Сы́на, Ему́же тре́петно предстою́. Испо́лнишажеся днíе роди́ти Ей, и роди́ Сы́на перворо́дна, Его́же не насади́ му́жъ; роди́ Сы́на, Его́же не поноси́ оте́цъ пло́тянъ; роди́ Сы́на, Его́же не насади́, ни насѣ́я тѣ́ло; роди́ Сы́на, Содѣ́теля человѣ́ча; роди́ въ пеще́рѣ, и въ Перси́дѣ яви́ся. Хри́сту ро́ждьшуся въ Виѳлее́мѣ Іюде́йстѣмъ, се́ волсви́ отъ восто́къ пріидо́ша во Іеросали́мъ, глаго́люще: гдѣ́ е́сть ро́ждьшійся ца́рь Іюде́йскій? гдѣ́ роди́ся посла́вый предъ Собо́ю звѣзду́? гдѣ́ е́сть водя́й на́съ посредѣ́ лучи́ по свѣ́ту несвѣ́дому? гдѣ́ е́сть защища́яй вселе́нную дла́нію ми́рною? гдѣ́ е́сть вездѣ́ явля́яйся, и въ пло́ти тая́ся? гдѣ́ е́сть разрѣши́вый ны́ отъ пре́лести, и наставля́я на́съ ко и́стиннѣй благода́ти? гдѣ́ е́сть яви́выйся Авраа́му подъ ду́бомъ Мамврíйскимъ Тро́ицею Ангелъ? гдѣ́ е́сть не опали́вый купины́ и утро́бы не растли́вый? гдѣ́ е́сть, Иже изъ Отца́ не ви́димъ, и изъ Ма́тере безъ скве́рны? гдѣ́ е́сть пресуши́вый Чермно́е /л. 133/ мо́ре, и млеко́мъ пита́емь? гдѣ́ е́сть погруже́й фарао́на и Ирода тая́йся? гдѣ́ е́сть связа́вый змíя? гдѣ́ е́сть, Его́же не ви́дѣша а́нгели, а человѣ́ки ви́димъ бы́сть? И се́ звѣзда́, ю́же ви́дѣша на восто́цѣ, предъ ни́ми идя́ше, до́ндеже прише́дши, ста́ верху́, идѣ́же бя́ше Отроча́, Ему́же сла́ва ны́нѣ и при́сно и во́ вѣки вѣко́мъ, ами́нь.

Акафист Божией Матери

1-я часть Акафиста

Кондак: Взбранной Воеводе победительная, яко избавльшеся от злых, благодарственная восписуем Ти раби Твои Богородице: но яко имущая державу непобедимую, от всяких нас бед свободи, да зовем Ти: Радуйся Невесто Неневестная.

Икос 1: Ангел предстатель с небесе послан бысть, рещи Богородице: радуйся! и со безплотным гласом воплощаема Тя зря Господи, ужасашеся и стояше, зовый к Ней таковая: радуйся, Еюже радость возсияет: радуйся, Еюже клятва исчезнет. Радуйся, падшаго Адама воззвание: радуйся, слез Евиных избавление. Радуйся, высото неудобовосходимая человеческими помыслы: радуйся, глубино неудобозримая и ангельскима очима. Радуйся, яко еси Царево седалище: радуйся, яко носиши Носящаго вся. Радуйся, звездо являющая Солнце: радуйся, утробо Божественнаго воплощения. Радуйся, Еюже обновляется тварь: радуйся, Еюже покланяемся Творцу. Радуйся Невесто Неневестная.

Кондак 2: Видящи святая Себе в чистоте, глаголет Гавриилу дерзостно: преславное твоего гласа неудобоприятельно души Моей является: безсеменнаго бо зачатия рождество како глаголеши, зовый: Аллилуиа.

Икос 2: Разум недоразумеваемый, разумети Дева ищущи, возопи к служащему: из боку чисту, сыну како есть родитися мощно, рцы Ми? К Нейже он рече со страхом, обаче зовый сице: радуйся, совета неизреченнаго таиннице: радуйся, молчания просящих веро. Радуйся, чудес Христовых начало: радуйся, велений Его главизно. Радуйся, лествице небесная, еюже сниде Бог: радуйся, мосте преводяй сущих от земли на небо. Радуйся, ангелов многословущее чудо: радуйся бесов многоплачевный струпе. Радуйся, Свет неизреченно родившая: радуйся, еже како, ни единагоже научившая. Радуйся, премудрых превосходящая разум: радуйся, верных озаряющая смыслы. Радуйся Невесто Неневестная.

Кондак 3: Сила Вышняго осени тогда к зачатию браконеискусную, и благоплодная Тоя ложесна, яко село показа сладкое, всем хотящим жати спасение, внегда пети сице: Аллилуиа.

Икос 3: Имущи Богоприятную Дева утробу, востече ко Елисавети: младенец же оноя абие познав Сея целование, радовашеся, и играньми яко песньми вопияше к Богородице: радуйся, отрасли неувядаемыя розго: радуйся, плода безсмертнаго стяжание. Радуйся, Делателя делающая Человеколюбца: радуйся, Садителя жизни нашея рождшая. Радуйся, ниво, растящая гобзование щедрот: радуйся, трапезо, носящая обилие очищений. Радуйся, яко рай пищный процветаеши: радуйся, яко пристанище душам готовиши. Радуйся, приятное молитвы кадило: радуйся, всего мира очищение. Радуйся, Божие к смертным благоволение: радуйся, смертных к Богу дерзновение. Радуйся Невесто Неневестная.

Кондак 4: Бурю внутрь имея помышлений сумнительных, целомудренный Иосиф смятеся, к Тебе зря небрачней, и бракоокрадованную помышляя, Непорочная: уведев же Твое зачатие от Духа Свята, рече: Аллилуиа.

И паки кондак: Взбранной Воеводе:

2-я часть Акафиста

И паки глаголем кондак: Взбранной Воеводе:

И другия икосы и кондаки, 6:

Икос 4: Слышаша пастырие ангелов поющих плотское Христово пришествие, и текше яко к Пастырю, видят Сего яко Агнца непорочна, во чреве Мариине упасшася, Юже поюще реша: радуйся, Агнца и Пастыря Мати: радуйся, дворе словесных овец. Радуйся, невидимых врагов мучение: радуйся, райских дверей отверзение. Радуйся, яко небесная срадуются земным: радуйся, яко земная сликовствуют небесным. Радуйся, апостолов немолчная уста: радуйся, страстотерпцев непобедимая дерзосте. Радуйся, твердое веры утверждение: радуйся, светлое благодати познание. Радуйся, Еюже обнажися ад: радуйся, Еюже облекохомся славою. Радуйся Невесто Неневестная.

Кондак 5: Боготечную звезду узревше волсви, тоя последоваша зари: и яко светильник держаще ю, тою испытаху крепкаго Царя: и достигше Непостижимаго, возрадовашася Ему вопиюще: Аллилуиа.

Икос 5: Видеша отроцы халдейстии на руку Девичу, Создавшаго рукама человеки, и Владыку разумевающе Его, аще и рабий прият зрак, потщашася дарми послужити Ему, и возопити Благословенней: радуйся, звезды незаходимыя Мати: радуйся, заре таинственнаго дне. Радуйся, прелести пещь угасившая: радуйся, Троицы таинники просвещающая. Радуйся, мучителя безчеловечнаго изметающая от начальства: радуйся, Господа Человеколюбца показавшая Христа. Радуйся, варварскаго избавляющая служения: радуйся, тимения изымающая дел. Радуйся, огня поклонение угасившая: радуйся, пламене страстей изменяющая. Радуйся, верных наставнице целомудрия: радуйся, всех родов веселие. Радуйся Невесто Неневестная.

Кондак 6: Проповедницы богоноснии бывше волсви, возвратишася в Вавилон, скончавше Твое пророчество: и проповедавше Тя Христа всем, оставиша Ирода яко буесловяща, не ведуща пети: Аллилуиа.

Икос 6: Возсиявый во Египте просвещение истины, отгнал еси лжи тьму: идоли бо его Спасе, не терпяще Твоея крепости, падоша. Сих же избавльшиися вопияху к Богородице: радуйся, исправление человеков: радуйся, низпадение бесов. Радуйся, прелести державу поправшая: радуйся, идольскую лесть обличившая. Радуйся море, потопившее фараона мысленнаго: радуйся, каменю, напоивший жаждущия жизни. Радуйся, огненный столпе, наставляяй сущия во тьме: радуйся, покрове миру, ширший облака. Радуйся пище, манны приемнице: радуйся, сладости святыя служительнице. Радуйся, земле обетования: радуйся, из неяже течет мед и млеко. Радуйся Невесто Неневестная.

Кондак 7: Хотящу Симеону от нынешняго века претавитися прелестнаго, вдался еси яко Младенец тому: но познался еси ему и Бог совершенный. Темже удивися Твоей неизреченней премудрости, зовый: Аллилуиа.

И паки кондак: Взбранной Воеводе:

3-я часть Акафиста

И по возгласе, кондак: Взбранной Воеводе:

И чтем другия шесть икосов и кондаков.

Икос 7: Новую показа тварь явлься Зиждитель, нам от Него бывшим, из безсеменныя прозяб утробы, и сохранив Ю, якоже бе, нетленну. Да чудо видяще воспоим Ю, вопиюще: радуйся, цвете нетления: радуйся, венче воздержания. Радуйся, Воскресения образ облистающая: радуйся, ангельское житие являющая. Радуйся древо светлоплодовитое, от негоже питаются вернии: радуйся древо благосеннолиственное, имже покрываются мнози. Радуйся, во чреве носящая Избавителя плененным: радуйся, рождшая Наставника заблуждшим. Радуйся, Судии праведнаго умоление: радуйся, многих согрешений прощение. Радуйся, одеждо нагих дерзновения: радуйся, любы всякое желание побеждающая. Радуйся Невесто Неневестная.

Кондак 8: Странное рождество видевше, устранимся мира, ум на небеса преложше: сего бо ради высокий Бог, на земли явися смиренный Человек, хотяй привлещи к высоте, Тому вопиющия: Аллилуиа.

Икос 8: Весь бе в нижних, и вышних никакоже отступи неописанное Слово: снизхождение бо Божественное, не прехождение же местное бысть, и рождество от Девы Богоприятныя, слышащия сия: радуйся, Бога невместимаго вместилище: радуйся, честнаго таинства двери. Радуйся, неверных сумнительное слышание: радуйся, верных известная похвало. Радуйся, колеснице пресвятая, Сущаго на херувимех: радуйся, селение преславное, Сущаго на серафимех. Радуйся, противная в тожде собравшая: радуйся, девство и рождество сочетавшая. Радуйся, Еюже разрешися преступление: радуйся, Еюже отверзеся рай. Радуйся, ключу Царствия Христова: радуйся, надеждо благ вечных. Радуйся Невесто Неневестная.

Кондак 9: Всякое естество ангельское удивися, великому Твоего вочеловечения делу: неприступнаго бо яко Бога, зряше всем приступнаго Человека, нам убо спребывающа, слышаща же от всех: Аллилуиа.

Икос 9: Ветия многовещанныя, яко рыбы безгласныя, видим о Тебе Богородице: недоумевают бо глаголати, еже како, и Дева пребываеши, и родити возмогла еси? Мы же таинству дивящеся, верно вопием: радуйся, премудрости Божия приятелище: радуйся, промышления Его сокровище. Радуйся, любомудрыя немудрыя являющая: радуйся, хитрословесныя безсловесныя обличающая: радуйся, яко обуяша лютии взыскателе: радуйся, яко увядоша баснотворцы. Радуйся, афинейская плетения растерзающая: радуйся, рыбарския мрежи исполняющая. Радуйся, из глубины неведения извлачающая: радуйся, многи в разуме просвещающая. Радуйся, кораблю хотящих спастися: радуйся, пристанище житейских плаваний. Радуйся Невесто Неневестная.

Кондак 10: Спасти хотя мир, Иже всех Украситель, к сему самообетован прииде, и Пастырь сый яко Бог, нас ради явися по нам Человек: подобным бо подобное призвав, яко Бог слышит: Аллилуиа.

И паки кондак: Взбранной Воеводе:

4-часть Акафиста

И паки поем кондак: Взбранной Воеводе:

И чтем оставльшияся шесть икосов и кондаков.

Икос 10: Стена еси девам Богородице Дево, и всем к Тебе прибегающим: ибо небесе и земли Творец устрои Тя Пречистая, вселься во утробе Твоей, и вся приглашати Тебе научив: радуйся, столпе девства: радуйся, дверь спасения: радуйся, начальнице мысленнаго наздания: радуйся, подательнице Божественныя благости. Радуйся, Ты бо обновила еси зачатыя студно: радуйся, Ты бо наказала еси окраденныя умом. Радуйся, тлителя смыслов упражняющая: радуйся, сеятеля чистоты рождшая. Радуйся, чертоже безсеменнаго уневещения: радуйся, верных Господеви сочетавшая. Радуйся, добрая младопитательнице девам: радуйся, невестокрасительнице душ святых. Радуйся Невесто Неневестная.

Кондак 11: Пение всякое побеждается, спростретися тщащееся ко множеству многих щедрот Твоих: равночисленныя бо песка песни аще приносим Ти Царю Святый, ничтоже совершаем достойно, яже дал еси нам Тебе вопиющим: Аллилуиа.

Икос 11: Светоприемную свещу, сущим во тьме явльшуюся, зрим святую Деву: невещественный бо вжигающи огнь, наставляет к разуму Божественному вся, зарею ум просвещающая, званием же почитаемая, сими. Радуйся, луче умнаго солнца: радуйся, светило незаходимаго света. Радуйся, молние души просвещающая: радуйся, яко гром, враги устрашающая. Радуйся, яко многосветлое возсияваеши просвещение: радуйся, яко многотекущую источаеши реку. Радуйся, купели живописующая образ: радуйся, греховную отъемлющая скверну. Радуйся, бане, омывающая совесть: радуйся чаше, черплющая радость. Радуйся, обоняние Христова благоухания: радуйся, животе тайнаго веселия, радуйся Невесто Неневестная.

Кондак 12: Благодать дати восхотев долгов древних, всех долгов решитель человеком, прииде Собою ко отшедшим Того благодати: и раздрав рукописание, слышит от всех сице: Аллилуиа.

Икос 12: Поюще Твое Рождество, хвалим Тя вси, яко одушевленный храм Богородице: во Твоей бо вселився утробе, содержай вся рукою Господь, освяти, прослави, научи вопити Тебе всех: радуйся, селение Бога и Слова: радуйся, святая святых большая. Радуйся, ковчеже позлащенный Духом: радуйся, сокровище живота неистощимое. Радуйся, честный венче царей благочестивых: радуйся, честная похвало иереев благоговейных. Радуйся, Церкве непоколебимый столпе: радуйся, царствия нерушимая стено. Радуйся, Еюже воздвижутся победы: радуйся, Еюже низпадают врази. Радуйся, тела моего врачевание: радуйся, души моея спасение. Радуйся Невесто Неневестная.

Кондак 13: О всепетая Мати, рождшая всех святых Святейшее Слово, нынешнее приемши приношение, от всякия избави напасти всех, и будущия изми муки, Тебе вопиющих: Аллилуиа.

Сей кондак глаголи трижды.

И паки чтется 1-й икос: Ангел предстатель:

Икос 1: Ангел предстатель с небесе послан бысть, рещи Богородице: радуйся! и со безплотным гласом воплощаема Тя зря Господи, ужасашеся и стояше, зовый к Ней таковая: радуйся, Еюже радость возсияет: радуйся, Еюже клятва исчезнет. Радуйся, падшаго Адама воззвание: радуйся, слез Евиных избавление. Радуйся, высото неудобовосходимая человеческими помыслы: радуйся, глубино неудобозримая и ангельскима очима. Радуйся, яко еси Царево седалище: радуйся, яко носиши Носящаго вся. Радуйся, звездо являющая Солнце: радуйся, утробо Божественнаго воплощения. Радуйся, Еюже обновляется тварь: радуйся, Еюже покланяемся Творцу. Радуйся Невесто Неневестная.

И паки кондак: Взбранной Воеводе:

Молитва

Приими, всеблагомощная, Пречистая Госпоже Владычице Богородительнице, сия честные дары, Тебе единей прикладныя, от нас, недостойных рабов Твоих: от всех родов избранная, всех тварей небесных и земных высшая явльшаяся, понеже бо Тебе ради бысть Господь Сил с нами, и Тобою Сына Божия познахом и сподобихомся святаго Тела Его и пречистыя Крове Его; темже блаженна еси в родех родов, Богоблаженная, Херувимов светлейши и Серафимов честнейши сущая. И ныне, всепетая Пресвятая Богородице, не престай молящися о нас, недостойных рабех Твоих, еже избавитися нам от всякаго совета лукаваго и всякаго обстояния и сохранитися нам неврежденным от всякаго ядовитаго прилога диавольскаго; но даже до конца молитвами Твоими неосужденных нас соблюди, яко да Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех Создателю возсылаем, ныне и присно, и во веки веков. Аминь.